[港股]科技股監管風暴下點算好?

早前筆者寫過一篇文章,分享投資醫藥股龍頭企業石藥(1093)的經驗,股價原本一如預期連年上升,手上投資在持續增持之下,整體都有一倍回報,但突然間中央政策改變了,所賺的錢由勁賺一倍變了倒蝕,最後等股價回升多少少便離場,同樣的股價周期,似乎又發生在科技股身上。

今次唔係想講科技股的問題,而是用石藥的投資經驗,講講科技股的表現(至少短期)。

石藥股價在2018年去到頂峰,遇上中央政策改變,涉及民生問題,政府要加緊監管藥價,至今石藥反彈之後,兩年來上唔番高位。近年又好似投資一般A股一樣,有波幅沒有增幅。


圖:石藥股價走勢(截至16/4/2021)

科技股遇上監管風暴

話說內地監管風暴席捲互聯網行業,里巴巴(09988)被天價重罰逾182億元人民幣後,連同阿里在內的34間互聯網平台巨企,包括騰訊(00700)、美團(03690)、百度(09888)等,都被監管部門盯住,對科技巨企利用市場支配地位、燒錢搶佔市場等行為,加以嚴肅整治,仲要佢地全面自我檢討,逐項徹底執番正嚟做。消息一出,科技股的股價自然調整。

科技股近年炙手可熱, 2020年更是豐盛的一年,不過高峰期剛過,遇上監管部門出手,對於小股民來說,投資隨時有機會由賺變蝕。


圖:南方恒生科技ETF今年以來股價走勢

用南方恒生科技股ETF(3033)做例子,股價從高峰期去到現今已經調整超過三成,咪話跌得小 。當然調整咁多,除了政策因素,也有估值太高的因素在內。不過,今次中央出手的大動作,令到一遍睇好科技股的大好友都要收歛,科技股的估值再唔可以升到天花板,因為中央政策令到投資的風險增加。

用以往的經驗,科技股監管風暴的打擊下,股價要捱沽,要捱幾耐?看中央的認真程度。與此同時,想撈貨的,看來也不用太心急。同時,股份可否重返高峰期,之後再創新高?似乎暫時看不到太大的動力,反彈會有,但長線會唔會好似石藥一樣,有波動難有大升幅,或許會好一點,始終科技股的業務空間比醫藥股大,但在監管之下,就要把風險意識提高多一些。

0